3D打印維港賽 “信德”最具創意
2017/07/17 11:07 | 來源 / 大公網

  圖:林鄭月娥表示,政府好重視培育創科人才/大公報記者林良堅攝

  生產力促進局早前搞咗個「魅力維港耀全城」3D打印設計比賽,邀請全港「中學雞」用3D打印機,設計同製作20個維港兩岸嘅地標建築模型。主辦方將勝出嘅20年大作,連同1214件3D打印製成嘅建築物拼出35平方米巨型維港,創下「單一場地展示最多3D打印展品」嘅健力士世界紀錄添!

  林鄭:研究普及STEM

  特首林鄭月娥同創科局局長楊偉雄,尋日出席咗頒獎禮同模型亮燈儀式。今次比賽嘅最高榮譽「特別卓越大獎」,由三位伯特利中學嘅中二學生奪得,佢地設計嘅「信德中心及港澳碼頭」非常精緻,不但融合3D技術,喺信德中心頂層造一個象徵回歸20周年嘅「20」立體字樣,如浮在半空;碼頭邊仲設計一個球狀嘅觀光台,象徵東方之珠,實在好有創意。

  林鄭月娥話,政府好重視培育創科人才,3D打印技術就係科學、技術、工程及數學(STEM)教育的一個典型例子,未來會繼續研究普及STEM教育,仲已委託生產力促進局,為初創企業、中學生、大學生,提供工作空間同技術支援,協助實現創新理念添!